قربان علي سڪندري، ڪلهوڙو: قربان علي سڪندري، 15 آگسٽ 1947ع تي ڳوٺ وڏ پڳيا ڪلهوڙي، تعلقي پني عاقل، ضلعي سکر ۾ ڄائو. ابتدائي تعليم پنهنجي ڳوٺ ۾ حاصل ڪيائين. نهايت ذڪي ۽ ذهين هجڻ سبب مائٽن هن کي وڌيڪ ديني تعليم حاصل ڪرڻ لاءِ 1961ع ڌاري جامعه راشديه درگاهه شريف پير جي ڳوٺ ۾ داخل ڪرايو، جتي هو وڏي محنت ۽ شوق سان درس نظامي پورو ڪري 1968ع ۾ دستار فضيلت ٻَڌي، سنَد حاصل ڪري فارغ التحصيل ٿيو ۽ سڪندري عالمن ۾ شمار ٿيو. ان کانپوءِ درس ۽ تدريس جي شروعات هن کُهڙا شريف جي مدرسي ۽ مسجد مان ڪئي. گهڻي وقت کانپوءِ هن پنهنجي شهر پني عاقل ۾ هڪ مخير کان پلاٽ حاصل ڪري مسجد ۽ مدرسي جو بنياد رکيو، جتي هن تعمير سان گڏ امامت، خطابت ۽ درس تدريس جو سلسلو جاري ڪيو. هن پنهنجي لڳاتار اڻٿڪ محنتن ۽ ڪوششن سان ذاتي خرچ تي مسجد ۽ مدرسه قادريه حزب الاسلام
پني عاقل جي تعمير پايه تڪميل تي پهچائي لڳ ڀڳ ويهن سالن تائين علمي ۽ ديني خدمتون جاري رکيون.
مولوي قربان ڪلهوڙو هڪ نهايت تجربيڪار منتظم ۽ ليکڪ هو. هن پنهنجي سموري زندگي لکڻ پڙهڻ کي ارپي ڇڏي. هو وڏو عرصو جمعيت علماءِ سڪندريه پاڪستان پير جو ڳوٺ جو صدر ۽ ناظم اعليٰ رهيو. جنهن جي تنظيم، ترتيب ۽ اشاعت جا سلسلا هن بهترين انداز سان هلايا. جمعيت علماءِ سڪندريه طرفان شايع ٿيندڙ مڪمل ڪتاب سندس ئي نگراني ۽ ادارت هيٺ شايع ٿي ملڪ جي ڪنڊ ڪڙڇ ۾ پهتا. ماهوار الراشد پير جو ڳوٺ جي ادارت ۽ اشاعت جو سلسلو تمام گهڻو وقت هن جي ذمي رهيو، جنهن ۾ هن پنهنجي قلم ذريعي علمي جوهر ڏيکاريا. ماهوار الهديٰ، صراط ۽ مهراڻ اخبار ۾ پڻ سندس ڪيترائي مضمون ۽ مقالا شايع ٿيا. تفسير ڪنزالايمان جي سنڌي ترجمي جي لکت، پروف ريڊنگ ۽ اشاعت ۾ هن اهم ڪردار ادا ڪيو. هن فقير عبدالقادر عبدي سولنگيءَ جا ڪالم ترتيب ڏيڻ ۽ ان جي اشاعت ۾ بنيادي ڪردار ادا ڪيو. ان کان سواءِ هن ڪافي سارا ننڍا وڏا ڪتاب ۽ مسودا ترتيب ڏنا آهن، جيڪي اشاعت جي مرحلن مان گذري رهيا آهن. هن ملفوظات جي ڇهن جلدن ۾ پکڙيل ذخيري کي نئين سر ترتيب ڏئي، ٻن جلدن ۾ شايع ڪرايو. ان کانسواءِ ’ديوان مسڪين‘ (فارسي/ سنڌي)، ’اصغر سائينءَ جو ڪلام‘، ’خزانة المعرفة‘ ۽ ’مخزنِ فيضان‘ (اردو ملفوظات شريف پير سيد محمد راشد روضي ڌڻيرح) جي سوڌ سنوار ۽ اشاعت پڻ مولوي قربان علي سڪندريءَ جي محنت ۽ جفاڪشيءَ جا اهڃاڻ آهن.
سڪندري قربان ڪجهه وقت مدرسه صبغة الفيض شهدادپور، سنڌ ۾ پڻ علمي خدمتون سرانجام ڏنيون. ان دوران هن اتي جمعيت علماءِ سڪندريه جي پليٽفارم تان سڪندريه اورنٽيئل ڪاليج جو بنياد رکيو ۽ وڏي جاکوڙ کان پوءِ سرڪاري طرح رجسٽرڊ ڪرائي صبغة الفيض ڳوٺ سومر فقير هنگوري لڳ شهدادپور، سنڌ جي بلڊنگ ۾ ان جو دفتر قائم ڪيو. هي هن وقت پنهنجي ڳوٺ ۾ رهي ٿو.
1947.08.15 عيسوي
قربان علي سڪندري، 15 آگسٽ 1947ع تي ڳوٺ وڏ پڳيا ڪلهوڙي، تعلقي پني عاقل، ضلعي سکر ۾ ڄائو.